आमा तिमी...

      लालीगुरांश

आमा तिमी धर्ती हौ भने

मेरा तर्कहरुलाई नियालेर हेर

मलाइ साच्चै दोषी पायौ भने

तिमी जे चाहान्छौ त्यही गर ।

आमा तिमी देवी हौ भने

मेरो निर्दोष चित्कार सुनेर हेर

मेरोे चित्कारमा खोट पायौ भने

तिम्रै हातले मेरो हत्या गर ।

आमा तिमी ममताकी खानी हौ भने

मेरो मुटुको धड्कन सुनेर हेर

त्यहाँ आमा पुकार सुनिनौ भने

बरु मलाई बहिस्कार नै गर ।

आमा तिमी न्यायकी मुर्ति हौ भने

सन्तानको कर्मको विश्लेषण गर

तिम्रा दैवीय आँखाले खोट देख्यो भने

गल्ती अनुसारको सजाय घोषणा गर ।