आजको मानव अधूरो र उधारो जीवन जीरहेछ

                                            लालीगुरांश  (सिर्जना भण्डारी) 

जीवन र जगत दुवैलाई गहिरिएर जान्नु पूर्ण जीवन रहेछ

परब्रम्हको ज्ञान र आत्माको साक्षातकार जन्मको सार रहेछ

तर आजको मानव केवल जगतलाई सर्बोपरि मानिरहेछ

भौतिकबादको भवसागरमा आफू र जीवनलाई खोजिरहेछ

जीवनलाई बिर्सेर जगतमा ऊ अधूरो र उधारो जीवन जीरहेछ ।

आजको मानव धन प्राप्ति र सम्मान प्राप्तिको पछाडि दौडिरहेछ

धन आर्जन र बस्तु आर्जनलाई आफ्नो सर्वोपरि कर्तव्य मानिरहेछ

सुखका लागि आफूलाई रित्याएर त्यसैलाई परम-आनन्द ठानिरहेछ

जीवनलाई बिर्सेर जगतमा ऊ अधूरो र उधारो जीवन जीरहेछ ।

आजको मानव दया र प्रेम केवल आफ्नालागि मात्र मागीरहेछ

नाता सम्वन्ध उसकालागि आवश्यकताको परिपूर्ति बनीरहेछ

आफूलाई आधुनिकतामा डुबाएर आफैं आफ्नो शत्रु बनिरहेछ

जीवनलाई बिर्सेर जगतमा ऊ अधूरो र उधारो जीवन जीरहेछ ।

आजको मानव सनातन धर्म बिर्सिएर नक्कली धर्म अंगालीरहेछ

अध्यात्मको के हो पूरा नबुझीकन ढोंग र आडम्बर देखाइरहेछ

संस्कार सबै अर्काको अंगालेर झूठो र मिथ्या संसारमा रमाइरहेछ

जीवनलाई बिर्सेर जगतमा ऊ अधूरो र उधारो जीवन जीरहेछ । -2