खोइ कहाँ खोजुं म, मेरा हराएका विम्व

                                

                           लालीगुरांश  (सिर्जना भण्डारी)

वर्षौ देखि परिवार अनि समाजमा

मैले पाएको पदवी 'गृहिणी'

मेरो पदवीमा कहील्यै बढुवा भएन

भयो त सीर्फ जिम्मेदारीमा बढुवा

एकोहोरो गृहिणीको मात्र नभई

दोहोरो, तेहोरो जिम्मेदारी बढ्यो

घर भित्र गृहिणीका रुपमा

श्रीमती, बुहारी, भाउजू अनि आमा

घर वाहिर श्रमजीवीका रुपमा

कर्मचारी, सेविका, कामदार अनि श्रमीक ।

किनकी

विद्या आर्जन गर्ने समयमा

डोली चढाइ जिम्मेदारी बढाइयो

खोइ कहाँ खोजुं म, मेरो ज्ञानको विम्व ?

क्षमता वृद्धि गर्ने समयमा

घर गरी खान बाध्य पारीयो

खोइ कहाँ खोजुं म, मेरो कार्य-कुशलताको विम्व ?

घरेलु श्रम प्रधान कामहरुलाई

अनुत्पादक ठानी अवमूल्यन गरीयो

खोइ कहाँ खोजुं म, मेरो आर्थिक सम्पन्नताको विम्व ?

समाज सेवा तथा सुधारका कामलाई

महिलाको नभई सदा पुरुष मात्रको क्षेत्र ठानीयो

खोइ कहाँ खोजुं म, मेरो सामाजिक सम्मानको विम्व ?

समकालीन पुरुष मित्रहरु आज

राजनीतिक, आर्थिक, सामाजिक र कला-संस्कृतीका क्षेत्रमा

ठूला-ठूला सम्मानजनक विम्वहरुले आभुषित छन्

खोइ कस-कसमा 
अनि कहाँ-कहाँ खोजुं म, मेरा हराएका विम्व ? -2