मन, मष्तिस्क र म

                         
                       लालीगुरांश  (सिर्जना भण्डारी)

म २१औं शताव्दीकी नारी
मेरो मन अनि मष्तिस्क
एक आपसमा जुधीरहन्छन्
मन भन्छ, तँ स्वतन्त्र पंक्षी हो
माथि माथि उड्न सक्छेस
मष्तिस्क भन्छ, 
तँ समाजको कमजोर कडी हो 
तेरा पखेटा काटीएका छन् ।

अव, कुनको कुरा सुनौं र मानांै
मलाई मनको विचार सही लाग्छ
तर त्यसलाई पछ्याउन सक्दीन
धेरै चुनौती र बाध्यताहरु छन्
मष्तिस्कले मेरो वास्तविकता भन्छ
तर त्यसलाई पचाउन सक्दीन
धेरै विभेद र उत्पीडनहरु छन् ।

उफ यो दोधार !! 
बरु म मेरै सुन्छु...
म एक स्वतन्त्र र गतिसिल नारी हुँ
मेरो समान अस्तीत्व छ समाजमा
धेरै उत्तरदाइत्व छन् काँधमा
उत्साह र प्रेरणाहरु छन् विवेकमा ।

मनको स्वच्छन्दता असिमीत हुन्छ
मष्तिस्कको दायरा सिमीत हुन्छ
असिमीत र सिमीत दुवै मान्य छैन मलाई
मध्यम मार्गमा हिंड्न चाहान्छु
स्वतन्त्र जिवन जिउन चाहान्छु
मन र मष्तिस्कको सन्तुलन चाहान्छु 
अनि, जिम्मेदार नागरीक बन्न चाहान्छु ।